نت پڑھنا ایں استغفار
کیسی توبہ ہے ایہہ یار ؟
سانویں دے کے لویں سوائی
وادھیاں دی توں بازی لائی
مسلمانی ایہہ کتھوں پائی
ایہہ تہاڈا کردار
نت پڑھنا ایں استغفار
جتھے نہ جانا اوتھے جائیں
مال پرایا منہ دھر کھائیں
کوڑ کتاباں سر تے چائیں
پھر تیرا اعتبار
نت پڑھنا ایں استغفار
ظالم ظلموں ناہیں ڈردے
اپنی املیں آپے مردے
مونہوں توبہ دلوں نہ کردے
ایتھے اوتھے ہون خوار
نت پڑھنا ایں استغفار
سو دن جیویں اک دن مرسیں
اس دن خوف خدا دا کرسیں
اس توبہ تھیں توبہ کرسیں
اوہ توبہ کس کار ۔
نت پڑھنا ایں استغفار
بلھے شاہ دی سنو حقایت
ہادی پھڑیا ہوئی ہدایت
میرا سائیں شاہ عنایت
اوہو لنگھاوے پار
نت پڑھنا ایں استغفار
کیسی توبہ ہے ایہہ یار ؟
Reply With Quote